Kuch Bikhre Moti


Chand Ashaar…

jo muqaddar me.n likhaa thaa puuraa huaa
kyaa bataauu.N shab-e-vasl kaa maajaraa
un kii zid meraa israar itanaa ba.Dhaa
faisalaa ho na paayaa azaan ho ga_ii
[Akhtar]

kah to sakataa huu.N majabuur kar sakataa nahii.n
iKhtiyaar apanii jagah, bebasii apanii jagah
[Anwar 'Shaoor']

aql-aaraa_ii-o-tadabiir se kyaa hotaa hai
vahii hotaa hai jo ma.nzuur-e-Khudaa hotaa hai
['Arshad' Lakhnavi]

har ek shahar-e-nigaraa.N samajh rahaa hai mujhe
zaraa qariib se dekho dhuaa.N dhuaa.N huu.N mai.n
[Aziz Bano 'Wafa']

Khataa to jab ho ke ham arz-e-mudd'a bhii kare.n
kisii ko chaahate rahanaa ko_ii Khataa to nahii.n
['Iqbal' Azeem]

mujhe raaste me.n pa.Daa huaa kisii bad-nasiib kaa Khat milaa
kahii.n Khuun-e-dil se likhaa huaa kahii.n aa.Nsuuo.n se miTaa huaa
['Iqbal' Azeem]

Na'at:

faasalo.n ko taqalluf hai ham se agar
ham bhii be-bas nahii.n be-sahaaraa nahii.n
Khud u.nhii.n ko pukaare.nge ham duur se
raaste me.n agar paao.n thak jaaye.nge
['Iqbal' Azeem]

ab use kaun bataaye dilo.n kii majabuurii
mai.n kyaa karuu.N ke nayaa hamasafar bhii achchhaa hai
[Javed 'Saba']

mumkin hai farishto.n se ko_ii sev huaa ho
mai.n itanaa gunahagaar kabhii ho nahii.n sakataa
['Josh' Malsiyani]

hi.ndii hone par naaz jise kal thaa hijaazii ban baiThaa
apanii mahafil kaa ri.nd puraanaa aaj namaazii ban baiThaa
[Kashmiri Pandit]
This sher was wriiten in criticsm of Iqbal's move from 'secular' poetry.

ham subah parasto.n kii ye riit puraanii hai
haatho.n me.n qalam rakhanaa yaa haath qalam rakhanaa
[Khalid Ali]

tumhe.n kyaa Khabar ke mai.n kaun huu.N
mere qaatilo.n se hii se puuchh lo
ji.nhe.n hukm-e-qatl milaa magar
ji.nhe.n ajr-e-qatl milaa nahii.n
[Khalid Ali]

pas-murdagii-e-gul pe ha.Nsii jab ko_ii kalii
aavaaz dii Khizaa.N ne tuu bhii nazar me.n hai
['Mahshar' Badayuni]

qabahate.n to yahii hai.n musafaato.n me.n merii
safar nayaa hai shariik-e-safar puraane hai.n
['Mahshar' Badayuni]

kah do Meer-o-Ghalib se, ham bhii sher kahate hai.n
vo sadii tumhaarii thii, ye sadii hamaarii hai
[Manzar]

aaj phir qatl ke ilzaam se bachane ke liye
ro rahe hai.n mujhe suulii pe chaa.Dhaane vaale
['Manzar' Bhopali]

haaye us vaqt najuumii ko maut aa ga_ii
jab mere paas cha.nd savaalaat rah gaye
['Manzar' Bhopali]

ab a.nban sii ho ga_ii hai baaGabaa.N se
mujhako nikalaa hii samajho gulistaa.N se
[Meer 'Majrooh']

qatl-e-Hussain asl me.n marg-e-Yaziid hai
islaam zi.ndaa hotaa hai kar karbalaa ke baad
[Mohammed Ali 'Johar']

nai-ra.ng-e-siyaasat-r-dauraa.N to dekhiye
ma.nzil u.nhe.n milii jo shariike safar na the
['Mohsin' Bhopali]

umr bhar to karii nii.nd ne bevafaa_ii
jo o.Dhaa qafan aa ga-ii rote rote
['Munsif' Dehalvi]

kis ko mu.D kar dekhanaa thaa phir pas-e-gard-e-safar
lauTane kaa dam to aavaaz-e-jaras me.n bhii na thaa
['Musawwir' Sabzwari]

iid kaa din hai gale aaj to mil le zaalim
rasm-e-duniyaa bhii hai, mauqaa bhii hai, dastuur bhii hai
['Qamar' Badayuni]

qataa:
raah-e-ma.nzil me.n Khvaahish-e-saayaa
kab ye isaluub zeb detaa hai
arz kar duu.N jo naa-gavaar na ho
har sahaaraa fareb detaa hai
['Qasri' Kanpuri]

baat kiradaar kii hotii hai vagaranaa "Aarif"
qad me.n i.nsaan se saayaa bhii ba.Daa hotaa hai
[Raashid 'Aarif']

jo daaman tum ne khaalii kar diyaa hai
use ashko.n se bharataa jaa rahaa huu.N
tumhaare baad aur tho.Daa saa jii luu.N
isii koshish me.n marataa jaa rahaa huu.N
['Rasheed' Niyaaz]

u.nhe.n ye fikr ke sitaaro.n se duur jaa na sake
hame.n ye sharm zamii.n ko zamii.n banaa na sake
['Shafeeq' Jaunpuri]

Khaamosh tum the aur mere ho.NTh bhii ba.nd
phir itanii der kaun thaa jo bolataa rahaa
[Shiv Kumar 'Nizam']

ma.nzilo.n tak na pahu.Nche to ham kyaa kare.n
raaste ham ko aise dikhaaye gaye
[Syed 'Kamal']

ye mere daur ke rah-numaa-e-vatan
jis taraf bhii gaye karbalaa kar gaye
['Tajoor' Sultana]

ham vo siyaah-baKht hai.n "Tariq" ke shahar me.n
khole.n dukaan kafan kii to log maranaa chho.D de.n
['Tariq' Aziz]

ghar to aisaa kahaa.N kaa thaa lekin
dar-ba-dar hai.n to yaad aataa hai
['Umeed' Fazli]

raushanii kisii kii zarurrat nahii.n hotii lekin
jo diyaa ghar ko jalaa Daale na ghar me.n rakhanaa
[Umeed Fazli]

ehasaas kaa a.ndaaz badal jaataa hai
aa.Nchal bhii usii taar se banataa hai kafan bhii
[Unknown]

Gam baa.NTane kii chiiz nahii.n phir bhii dosto
ek duusare ke haal se vaaqif rahaa karo
[Unknown]

har daur me.n kuchh aur hai.n sachchaa_ii ke miyaar
ye baat alag zahar kii taasiir vahii hai
[Unknown]

tere mashvare ke Khuluus par mujhe tark-e-ishq qubuul hai
magar ek baat hai ham-nashii.n merii zi.ndagii kaa savaal hai
[Unknown]

yaaraan-e-safar hai.n tez qadam ai kash-ma-kash-e-dil kyaa hogaa
rukataa huu.N to bichha.Daa jaataa huu.N chalataa huu.N to chalanaa mushkil hai
[Unknown]

yahaa.N kisii ko bhii kuchh hasb-e-aarazuu na milaa
kisii ko ham na mile aur ham ko tuu na milaa
['Zafar' Iqbal]

ek tabassum ki zarb-e-mubham se halqaa-e-dard to.D lete hai.n
ham ko ye bhii kamaal haasil hai Gam se Khushiyaa.N nicho.D lete hai.N
['Zohra' Naseem]

Gam is qadar ba.Dhe ke mai.n ghabaraa ke pii gayaa
is dil kii bebasii pe mai.n taras khaa ke pii gayaa
ba.Dii der se Thukaraa rahaa thaa ye jahaa.N
ke mai.n is jahaa.N ko Thukaraa ke pii gayaa
[Unknown]

ye samajh ke maanaa hai sach tumhaarii baato.n ko
itane Khuubasuurat lab jhuuTh kaise bole.nge
[Unknown]

shaam hote hii charaaGo.n ko bujhaa detaa huu.N
ye dil hii kaafii hai terii yaad me.n jalane ke liye
[Unknown]

ye terii aa.Nkho.n kaa bhii qusuur hai
mai.n tanhaa gunahagaar nahii.n
[Unknown]

TuuT jaate hai.n sabhii rishte magar
dil se dil kaa raabtaa apanii jagah
dil ko hai tujh se na milane kaa yaqii.n
tujh se milane kii duaa apanii jagah
[Unknown]

tere aazaad ba.nde kii na ye duniyaa na vo duniyaa
yahaa.N jiine kii paaba.ndii vahaa.N marane kii paaba.ndii
[Unknown]

jab paas ho to ruKh se nigaahe.n na mo.Danaa
jab duur ho to meraa tasavvur na chho.Danaa
ai dost dil lagaane se pahale ye soch le
mushkil bahut hai rishto.n kii za.njeere.n to.Danaa
[Unknown]

ek naam kyaa likhaa teraa saahil kii ret par
phir umr bhar havaa se merii dushmanii rahii
[Unknown]

aa sika.nder-e-hunar aazamaaye.n
tuu tiir aazamaa, ham jigar aazamaaye.n
[Unknown]

mast nazaro.n se dekh lenaa thaa
agar tamannaa thii aazamaane kii
ham to behosh yuu.N hii ho jaate
kyaa zaruurat thii muskuraane kii
[Unknown]

chehare pe banaavaT kaa Gussaa
aa.Nkho.n se chhalakataa pyaar bhii hai
is shauq-e-adaa ko kyaa kahiye
i.nkaar bhii hai iqaraar bhii hai
[Unknown]

mere dil me.n ko_ii aavaaz ubhar aatii hai
tere hii baal bikhar jaate hai.n diivaaro.n pe
terii hii shaql kitaabo.n me.n nazar aatii hai
[Unknown]

tuu is tarah se mere dil me.n samaa_ii hai
jahaa.N bhii jaauu.N lagataa hai terii mahafil hai
[Unknown]

is me.n motii hai ke patthar kise Khabar
dil to samu.ndaro.n se bhii gaharaa hai dosto
[Unknown]

raaste me.n gire hai.n phuul uThaataahai ko_ii ko_ii
muhabbat karate hai.n sabhii nibhaataa hai ko_ii ko_ii
[Unknown]

faasale jism ko duur le jaate hai.n
par dilo.n ke shahar to uja.Date nahii.n
aa.nkho.n se aa.Nkho.n kaa rishtaa TuuT jaaye bhii to
saath dekhe huye Khvaab to miTaTe nahii.n
[Unknown]

apane aaGaaz se aaj tak zi.ndagii
terii hii yaad me.n gum hai
phir bhii jaane kyuu.N ye ehasaas hai
jaise chaahat merii kam rahii
[Unknown]

ek musaafir ne raat pichhale pahar
apane mahabuub ke na aane par
kar diye taaj mahal ke Tukare
aab-e-jamunaa me.n phe.Nk ke patthar
[Unknown]

kal milaa vaqt to zulfe.n terii sulajhaa duu.Ngaa
aaj ulajhaa huu.N zaraa vaqt ke sulajhane me.n
yuu.n to sulajh jaatii hai.n ulajhii zulfe.n
umr kaT jaatii hai vaqt ke sulajhane me.n
[Unknown]

dil ko manaanaa gar hotaa aasaan
n akarataa kisii ko yuu.N ye pareshaa.N
ta.nhaa na rahataa bharii mahafil me.n
na hotii vo haalat jo ho na bayaa.N
[Unknown]

suukh jaate hai.n lab lafz milate nahii.n
hotaa nahii.n ham se ishq bayaa.N
u.nhe.n kaise bataauu.N dil kii lagii
kaise sikhaauu.N aa.Nkho.n kii zubaa.N
[Unknown]

Dhuu.NDataa phirataa huu.N mai.n logo.n me.n shabahat us kii
ke vo Khvaabo.n me.n bhii lagatii hai Khayaalo.n jaisii
[Unknown]